Ақтау қаласына жақын Қаракөлде 30 аққудың неден қырылғаны анықталды, деп хабарлайды kazlenta.kz тілшісі Ulysmedia.kz сайтына сілтеме жасап.
Экологтар алдымен судың сынамасын алды. Талдау нәтижесіне сәйкес, зиянды қалдықтардың шекті мөлшері анықталған жоқ.
Ал облыстық орман шаруашылығы және жануарлар дүниесі комитетіне қарасты инспекция мамандары құстардан тест сынамасын алды. Қорытындысы оң болып шықты. Қырылған аққулардан құс тұмауы анықталды.
Естеріңізге салсақ, бұған дейін "Қарақия-Қаракөл" мемлекеттік табиғи қорығының инспекторлары көлдің жағасында 30 аққудың өлігін тапқанын жазған едік.
Қаракөл – Қазақстанның оңтүстік-батысындағы жасанды көл (су қоймасы). Ол Маңғыстау облысындағы Ақтау қаласынан оңтүстік-шығысқа қарай 10 километр қашықтықта орналасқан.