Петропавлдағы жаңа инновациялық жылыжайда қияр алғашқы жемістерін бере бастады. Жылыжай кешенінің жұмысымен облыс әкімі Ғауез Нұрмұхамбетов танысты, деп хабарлайды kazlenta.kz.
Жылыжайда күн сайын 6 тоннаға дейін қияр жиналады, толық қуатына шыққанда өнімділік 16 тоннаға дейін жетпек.
Солтүстік өңір үшін жылыжайдың болуы – қажеттілік. Солтүстікқазақстандықтар жаңа піскен көкөністермен жыл бойына қамтылады, әрі импорттық өнімге қарағанда арзанырақ. Жергілікті қияр қаламыздың супермаркеттерінде сатыла бастады.
Жалпы, жаңа жылыжайдан жылына 3 мың тонна қияр, қызанақ және салат жиналмақ. «Зеленый север» серіктестігі жобаға 1,4 млрд теңге инвестиция құйды. Тағы 5,8 млрд теңгені «Солтүстік» ӘКК жеңілдетілген несие түрінде қаржыландырды. Мемлекет инженерлік желілерді тартуға да көмектесті.
Бұл 4-ші буынды жылыжай кешені, Нидерланды елінің заманауи қондырғылары орнатылды. Жылыжайдың өз микроклиматы бар, бүкіл процесс компьютермен басқарылады.