Сот қызметкерлері жастармен кездесті

Шымкент қаласындағы Әл-Фараби атындағы кітапханада   Адам құқықтары күніне арналған «Сен өз құқығыңды білесің бе?» тақырыбында сот қызметкерлерімен кездесу кеші өтті.

Іс-шараға Шымкент қаласының Кәмелетке толмағандардың істері жөніндегі мамандандырылған ауданаралық сотының судьясы Болат Қарабаев, қалалық соттың баспасөз қызметінің маманы Қабыл Дүйсенби және Ө.Жәнібеков атындағы Оңтүстік Қазақстан Педагогикалық университетінің студенттері мен кітапхананың оқырмандары қатысты.  

Кездесу басында сот жүйесінің үздігі Қабыл Тұрарұлы баяндама жасап, бұдан 75 жыл бұрын 1948 жылы желтоқсан айында Біріккен Ұлттар Ұйымының Бас Ассамблеясы қабылдаған «Адам құқықтарының жалпыға бірдей декларациясының» кейбір баптары туралы және Қазақстан Республикасының (бұдан әрі – ҚР) Конституциясына 1998, 2007, 2011, 2017, 2019 және 2022 жылдары енгізілген өзгерістер мен толықтыруларға жан-жақты тоқталып, кеңінен айтып берді.

Судья Болат Ерменбайұлы өз сөзінде, адамгершілік ізгі қасиеттер мен ар-ождан бостандығы және адалдық пен мейірімділік туралы ой қозғады. Сонымен қатар, ол аудандық сотта өзі қараған кейбір алаяқтық істерге тоқталып, жастарға алаяқтық қылмыстың құрбаны болудан әрқашанда сақ болып, абайлау қажеттігін айтып, осындайларға алданып қалмау керектігін ескертіп өтті.

Жиын барысында кешке қатысушы студенттер мен оқырмандар сот қызметкерлеріне көкейлерінде жүрген сұрақтарын қойып, оған толыққанды жауаптарын алды. Кездесуде жастар белсенділік танытып, өздерінің ойларын ортаға салып және бүгінгі кездесуде өздерінің құқықтарына қатысты кейбір білмейтін нәрселерін біліп алғандарын да жасырмады.

Кездесу соңында кітапхана директорының орынбасары Асылзат Оспанқызы қонақтарға іс-шараға арнайы келіп, жастарға «Адам құқықтарының жалпыға бірдей декларациясы» мен Ата Заңымызды жан-жақты түсіндіріп әрі өз пікірлері мен тұжырымды ойларымен бөліскені және қойылған сұрақтарға тұщымды жауап бергендері үшін сот қызметкерлеріне алғысын білдірді.скачать dle 11.1смотреть фильмы бесплатно