Сағат 09:50-де қорық аумағына "Қазвиаорманқорғау" тікұшағымен ұшып барлау жүргізілді, деп хабарлайды kazlenta.kz тілшісі ҚР ТЖМ баспасөз қызметіне сілтеме жасап.
Ұшу нәтижелері бойынша жанып жатқан ашық от көзі табылған жоқ, өрттің таралу қаупі жоқ.
Көлдің ішінде құрғақ қамыс жанып жатқан Бишағай орманшылығында, Науырзым орманшылығында, сондай-ақ Қарамайшы бөлімшесінің ауданындағы жекелеген түтін учаскелерін сөндіру жұмыстары жүргізілуде. Барлық жану учаскелерінде жер жыртылуда.
Өрт орнында 202 адам, 55 бірлік техника жұмыс істеуде.
Өрттің жалпы ауданы анықталып жатыр.
Елді мекендерге қауіп жоқ. Қаза тапқандар жоқ. Өрттен 1966 жылы туған қорықтың жұмысшысы зардап шекті, қолдары мен аяқтарының 30%-ы күйіп 1, 2 дәрежелі күйік алып, орташа ауыр жағдайда Науырзым ауданының ОАА хирургия бөліміне жеткізілді.