Ақтөбе облысында "Қауіпсіз жол" ЖПІШ қорытындыланды, - деп хабарлайды kazlenta.kz тілшісі Polisia.kz сайтына сілтеме жасап.
11–19 шілде аралығында Ақтөбе облысының аумағында республикалық "Қауіпсіз жол" жедел-профилактикалық іс-шарасы аясында полиция қызметкерлері жол-көлік оқиғаларының алдын алуға, жол жүрісі қағидаларын өрескел бұзатын жүргізушілерді анықтауға және жол қауіпсіздігін қамтамасыз етуге бағытталған ауқымды рейдтік іс-шаралар өткізді. Тоғыз күн ішінде полицейлер 3 мыңға жуық әкімшілік құқық бұзушылықты анықтады. Атап айтқанда, көлік құралын басқару кезінде телефон пайдаланудың 343 дерегі, қарсы бағыттағы жолаққа шығудың 55 дерегі, жүргізуші куәлігінсіз көлік басқарудың 179 дерегі, көлік құралын басқару құқығынан айырылғанына қарамастан рульге отырған 21 жүргізуші, сондай-ақ жолаушылар мен жүктерді тасымалдау талаптарын және қауіпсіздік белдігін пайдалану қағидаларын бұзудың 837 дерегі тіркелді. Алайда ең үлкен алаңдаушылық тудыратын мәселе – мас күйінде көлік басқару фактілері.
Профилактикалық жұмыстардың тұрақты жүргізілуіне және заң талаптарының қатаңдатылғанына қарамастан, кейбір жүргізушілер өз өмірі мен өзгенің өміріне қауіп төндіріп, мас күйінде рульге отыруын тоқтатпай келеді. Жедел-профилактикалық іс-шара барысында 62 жүргізушінің мас күйінде көлік басқарғаны анықталды. Оның ішінде 50 жүргізуші алкогольдік, ал 12 жүргізуші есірткілік масаң күйде болған. Барлық құқық бұзушыға қатысты Қазақстан Республикасының қолданыстағы заңнамасына сәйкес тиісті шаралар қабылданды. Сонымен қатар заң талаптарын өрескел бұзғаны үшін 316 көлік құралы мамандандырылған айып тұрағына қойылды.