Қызылорда облысы полиция департаментінің Жалағаш аудандық полиция бөлімінде Отан қорғаушылар күніне орай "Ардагерлер аллеясының" ашылу салтанаты өтті, – деп хабарлайды kazlenta.kz тілшісі Polisia.kz сайтына сілтеме жасап.
Мерекелік шараға Қызылорда облысы полиция департаменті бастығының орынбасары Оралбек Омаров және Ардагерлер кеңесінің төрағасы Әмірбек Шаймағамбетов арнайы қатысып, жиналған қауымды айтулы мерекемен құттықтады. "Ардагерлер аллеясы" – елге адал қызмет еткен азаматтардың еңбегін ұлықтайтын, олардың ерлігі мен өмір жолын кейінгі ұрпаққа өнеге ететін ерекше тағылымды орын. Бұл аллея ардагерлердің қоғамдағы орны мен беделін айқындап қана қоймай, жас буынның бойында патриоттық рух пен Отанға деген сүйіспеншілікті қалыптастыруға ықпал етеді. Сонымен қатар мұндай нысандар өткен мен бүгінді жалғап, ұрпақтар сабақтастығын нығайта түсетін маңызды рухани кеңістік екені сөзсіз.Салтанатты рәсім барысында "Ардагерлер аллеясы" ресми түрде ашылып, бұл игі бастама ардагерлерге көрсетілген құрметтің айқын көрінісі ретінде жоғары бағаланды. Іс-шара мерекелік концерттік бағдарламамен жалғасты, бұл барлық қонақ үшін күтпеген сый болды. Полиция қызметкерлерінің жарқын өнері, сондай-ақ офицерлердің жұбайлары мен "Жас сақшы" сыныбы оқушыларының шығармашылық нөмірлері кештің сәнін келтірді. Мұндай тағылымды шаралар – ұрпақтар сабақтастығын нығайтып, елге адал қызмет етудің мәнін тереңірек ұғындыра түсетін маңызды бастамалардың бірі. Ардагерлерге құрмет көрсету мен олардың өнегелі жолын насихаттау алдағы уақытта да өз жалғасын таба бермек.