Түркістан облысы әкімдігі жанындағы Сыбайлас жемқорлыққа қарсы іс-қимыл мәселелері жөніндегі комиссияның кезекті отырысы өтті.
Жиынға Түркістан облысының әкімі Нұралхан Көшеров, құқық қорғау органдарының басшылары, облыстық басқарма жетекшілері мен аудан, қала әкімдері қатысты. Комиссия отырысында табиғи ресурстар мен табиғат пайдалануды реттеу саласында сыбайлас жемқорлық тәуекелдерінің алдын алу, мемлекеттік қызметтердің ашықтығын қамтамасыз ету және осы бағытта атқарылып жатқан жұмыстардың тиімділігі қаралды.
Баяндамаларда өңірдің балық шаруашылығы саласындағы субсидиялау тетіктері, экологиялық рұқсаттарды беру, қоғамдық тыңдауларды ұйымдастыру, сондай-ақ аңшылыққа рұқсат беру қызметтері толықтай электрондық ақпараттық жүйелер арқылы жүзеге асырылып жатқаны атап өтілді. Мемлекеттік қызметтердің автоматтандырылуы адами фактордың ықпалын барынша азайтып, рәсімдердің ашықтығы мен айқындылығын қамтамасыз етуге мүмкіндік беруде. Нәтижесінде сыбайлас жемқорлық тәуекелдері төмендеп, қызмет көрсету сапасы артып келеді.
Сонымен қатар табиғи ресурстар және табиғат пайдалануды реттеу саласында сыбайлас жемқорлықтың алдын алу бағытында жүйелі жұмыстар жүргізілуде. Атап айтқанда, сыбайлас жемқорлық тәуекелдеріне ішкі талдаулар тұрақты түрде ұйымдастырылып, мемлекеттік қызмет көрсету процестері зерделенуде. Қызметкерлер арасында сыбайлас жемқорлыққа қарсы мәдениетті қалыптастыру, қызметтік әдеп талаптарын сақтау және заңнама нормаларын түсіндіру бойынша профилактикалық іс-шаралар жүзеге асырылуда.
Облыс әкімі Нұралхан Көшеров Мемлекет басшысы Қасым-Жомарт Тоқаевтың сыбайлас жемқорлыққа қарсы саясатты күшейту жөніндегі тапсырмаларын іске асыру барлық мемлекеттік органдар үшін басым міндет екенін атап өтті.
– Сыбайлас жемқорлықтың алдын алу – құқық қорғау органдарының ғана емес, барлық мемлекеттік мекемелер мен жергілікті атқарушы органдардың ортақ міндеті. Әсіресе табиғи ресурстарды пайдалану, жер қойнауын игеру, экология және табиғат қорғау салаларында ашықтық пен заңдылықты қамтамасыз ету маңызды. Әрбір мемлекеттік қызмет заң талаптарына сай, ашық әрі әділ көрсетілуі тиіс. Бұл бағыттағы жұмыстар тұрақты бақылауда болады, – деді облыс әкімі.
Жиында саладағы сыбайлас жемқорлық тәуекелдерін төмендету, мемлекеттік қызмет көрсету процестерін одан әрі цифрландыру, бақылау-қадағалау тетіктерін жетілдіру және азаматтармен кері байланысты күшейту мәселелері талқыланды.
Өңір басшысы жауапты мекемелерге сыбайлас жемқорлық тәуекелдеріне жүргізілетін ішкі талдау жұмыстарының сапасын арттыруды, тәуекелдерді жан-жақты зерделеп, анықталған мәселелер бойынша қолданыстағы заңнама талаптарына сәйкес тиісті шаралар қабылдауды тапсырды. Сонымен қатар мемлекеттік қызметтердің ашықтығын арттыру және алдын алу шараларының тиімділігін күшейту жөнінде нақты міндеттер жүктеді.
Комиссия отырысының қорытындысы бойынша мемлекеттік органдар қызметінің ашықтығы мен есептілігін қамтамасыз ету, сыбайлас жемқорлыққа қарсы мәдениетті қалыптастыру, заң талаптарының сақталуын бақылауды күшейту және алдын алу шараларының тиімділігін арттыру бағытындағы жұмыстарды жүйелі түрде жалғастыру міндеті қойылды.
Сыбайлас жемқорлыққа қарсы іс-қимыл – мемлекеттік саясаттың негізгі басымдықтарының бірі. Осыған байланысты Түркістан облысында мемлекеттік басқарудың ашықтығы мен тиімділігін арттыруға, заң үстемдігін қамтамасыз етуге және қоғамның мемлекеттік институттарға деген сенімін нығайтуға бағытталған жұмыстар тұрақты түрде жалғасады.