Сыбайлас жемқорлыққа қарсы қызмет пен Павлодар облысының әкімдігі білім беру ұйымдарында бірыңғай цифрлық есеп бойынша пилоттық жобасын іске қосты, деп хабарлайды kazlenta.kz тілшісі Антикорға сілтеме жасап.
Бұл жоба жемқорлық тәуекелдерін сыртқы талдау нәтижелері бойынша сыбайлас жемқорлық тәуекелдері анықталған және бюджет қаражатын еңбекақы төлеу қорынан ұрлаудың барлық схемасы ашылған білім беру саласындағы миллиардтаған бюджет қаражатын жымқыру себептерін жоюға бағытталған.
Сыбайлас жемқорлыққа қарсы іс-қимыл мәселелері жөніндегі облыстық ведомствоаралық комиссияның отырысында пилоттық жобаның бірлескен бұйрығы мен жұмыс жоспарына қол қойылды.
Павлодар облысына таңдау кездейсоқ емес. Білім беру саласындағы талдау қорытындысы бойынша осы өңірде жемқорлық тәуекелдерінің ең аз саны анықталды.
Бұған білім беру мекемелерінде қашықтықтағы бухгалтерлік есептің ақпараттық жүйесін қолдану әсер етті.
Цифрландыру қаржылық қажеттілікті асыра бағалаумен және негізсіз жалақы есептеумен байланысты тәуекелдерді айтарлықтай жояды.
Пилоттық жоба аясында ақпараттық жүйенің функционалын кеңейту жоспарлануда. Атап айтқанда, жалақының 50%-дан асатын аванстарды төлеу фактілерін бақылау және бұғаттау тетігі, педагогтар мен басқа да қызметкерлерінің жұмыс сағаттарының асқан лимитін шектеу, сабаққа қатысуды бақылау жүйесімен интеграциялау арқылы қызметкерлердің уақытын есепке алу табелін автоматты түрде қалыптастыру, қазынашылық есептілік нысандарын тікелей ақпараттық жүйеге жүктеу және т.б. функциялар енгізілетін болады.
Қазіргі таңда осындай пилотты Қазақстанның тағы бір облысында іске қосу мәселесі пысықталуда.
Ақпараттық жүйені тестілеудің оң нәтижесі болған жағдайда жоба бүкіл ел бойынша іске қосылады.
Айта кетейік, Сыбайлас жемқорлыққа қарсы қызмет 8,8 млрд теңге шығынмен білім беру саласында 133 қылмыстық істі тіркеді.