Жамбыл облысы әкімінің орынбасары Еркін Үйсімбаевтың қатысуымен Мемлекеттік сатып алу саласындағы сыбайлас жемқорлықтың алдын алу бойынша кеңес өтті. «Атамекен» кәсіпкерлер палатасы алаңында өткен кездесу барысында сыбайлас жемқорлық тәуекелдерінің алдын алу және кәсіпкерлерді мемлекеттік бюджетті бөлу кезінде заңсыз қызметтен қорғау мәселелері талқыланды. Кеңес жұмысына облыстың ірі және орта кәсіпкерлік субъектілері, мемлекеттік сатып алу, кәсіпкерлік және индустриялық-инновациялық даму, құрылыс, жолаушылар көлігі және автомобиль жолдары басқармаларының өкілдері, бизнес-қоғамдастықтың өкілдері қатысты.
ҚР Сыбайлас жемқорлыққа қарсы іс-қимыл Агенттігінің Жамбыл облысы бойынша департаментінің басшылығы сыбайлас жемқорлыққа қарсы күрес, оның алдын алу бойынша жүргізіліп жатқан жұмыстар туралы, сондай-ақ сыбайлас жемқорлыққа қарсы іс-қимыл саласындағы бірқатар заңнамалық актілерге енгізілген өзгерістер туралы айтты.
- Агенттік бизнесті мемлекеттік органдар тарапынан заңсыз араласудан қорғау бойынша шаралар қабылдауда. Бизнес мүдделерін қозғайтын тергеу әрекеттерін үйлестіру алгоритмі әзірленді. Іс жүзінде мемлекеттік сатып алулар саласында ірі кәсіпкерлер шенеуніктерге заңсыз сыйақы беруге мәжбүр болған фактілер аз емес. Бұған тапсырыс беруші мен бақылаушы органдар тарапынан кейінгі сауда-саттыққа қатысудан шеттету немесе қудалау негіз болып табылады, - деп атап өтті ҚР Сыбайлас жемқорлыққа қарсы іс-қимыл Агенттігінің Жамбыл облысы бойынша департаментінің превенция басқармасының басшысы Дәурен Омаров.
Жиын барысында сондай-ақ, облыстық Сыбайлас жемқорлыққа қарсы қызметінің араласуының арқасында «Қазына City» ЖШС мәселесі оң шешімін тапқандығы, Сарысу ауданы Түркістан ауылдық округі әкімдігінің жауапты лауазымдарына қатысты заңсыздықтардың анықталғандығы айтылды.
Кеңес отырысында сонымен қатар «Жамбыл Лифт Сервис» ЖШС мен Меркі ауданының орталық ауруханасы арасындағы қызмет көрсету шартының сомасын белгісіз себептермен 1,9 миллион теңгеден 394 мың теңгеге дейін төмендету туралы мәселе көтерілді. Аталмыш мәселені Қазақстан Республикасы Сыбайлас жемқорлыққа қарсы іс-қимыл Агенттігінің Жамбыл облысы бойынша департаменті басшысының бірінші орынбасары Ернар Мақажанов өз бақылауына алды.