7 маусым мен 5 шілде аралығында ішкі істер органдары көліктік бақылау инспекциясымен бірлесіп жанар-жағармайдың республикадан тыс жерлерге шығарылуына жол бермеу мақсатында рейдтік іс-шараларын жүргізіп жатыр, – деп хабарлайды kazlenta.kz тілшісі Polisia.kz сайтына сілтеме жасап.
Рұқсатсыз қосымша жанармай цистерналарын орнату арқылы көліктерді пайдалану ережелерін бұзу фактілерін анықтауға полиция қызметкерлері ерекше назар аударуда.
Аталған құқық бұзушылық үшін ҚР ӘҚБтК-нің 590-бабының 7-бөлігімен (Тиiстi рұқсатсыз қайта жабдықталған көлiк құралын басқару) әкімшілік жауапкершілік көзделген.
Рейдтік іс-шаралар басталғаннан бері полицейлер рұқсатсыз орнатылған қосымша отын бактарымен жабдықталған 20-ға жуық автокөлікті анықтады. Осы бұзушылық үшін 51 750 теңге көлемінде айыппұл түріндегі әкімшілік жауапкершілік көзделген. Заңсыз түрлендірілген автокөліктер бұзушылықтары жойылғанға дейін арнайы тұраққа қойылады.