Өскемен қаласында 5 жасар қызды қағып, мерт қылған автобус жүргізушісіне сот үкімі шықты, деп хабарлайды ҚазАқпарат-қа сілтеме жасаған kazlenta.kz
Жол-көлік оқиғасы Бажов көшесінде болған. Қоғамдық көлік жүргізушісі жолаушыларды аялдамадан түсірген кезде қауіпсіздік талаптарын сақтамай, 5 жасар қызды қағып кетті. Соның салдарынан ол сол жерде мерт болған. Аталған факті бойынша тәртіп сақшылары ҚР Қылмыстық Кодексінің 345-бабы 3-бөлігіне сәйкес тергеу амалдарын жүргізген.
Тергеу аяқталған соң іс Өскемен қалалық №2 сотында қаралды. «Сот барысында 59 жастағы ер адам кестеден кешігіп бара жатқаны үшін келесі аялдамаға асыққанын айтты. Артқы айнаға қарамаған ол жолаушылардың толық түсіп болғанына көз жеткізбестен есікті жауып, кетіп қалды. Ал аяғы есікке қысылған қыз жерге құлап түскен. Сол кезде оны автобус таптап кетті», - делінген сот үкімінде.
Сот шешімімен автобус жүргізушісі 2 жарым жылға бас бостандығынан айырылды. Сотталған азамат қылмысты абайсызда жасағандықтан жазасын қауіпсіздігі ең төмен түзету мекемесінде өтейді.