Алматыда көлік ұрысы адам өліміне әкеп соққан көлік апатын жасады, деп хабарлайды ҚазАқпарат-қа сілтеме жасаған kazlenta.kz
Алматы қалалық Полиция департаментінің мәліметінше, бұрын бірнеше рет сотты болған 22 жастағы азамат «Ақсай» ықшамауданындағы үйлердің бірінің ауласынан «Mazda» көлігін ұрлап кеткен. Содан кейін тағы бірнеше қылмыс жасаған.
Дәлірек айтсақ, Алатау ауданындағы тұрғын алабында күдікті түнгі уақытта үш көліктің аккумуляторын ұрлап кеткен. Ал таңғы алтыда адам өліміне әкеп соққан жол апатын жасады.
«Ол Саин көшесімен солтүстік бағытта келе жатып, Абай даңғылымен қиылыста «Toyota Corolla» және «Kia Rio» көліктерімен соқтығысқан. Салдарынан «Kia Rio» инерциямен кедергіге соғылды. Бұл көлікті 52 жастағы ер адам басқарған. Өкінішке орай, ол алған жарақаттарынан оқиға орнында көз жұмды», – деді Алматы қалалық ПД Анықтау басқармасының бастығы Олжас Шәріпов.
Күдіктіні патрульдік полиция қызметкерлері қолға түсірді. Белгілі болғандай, «Mazda» көлігінің иесі машинасының ұрланғанын білмеген.
«Адам өліміне әкеп соқтырған жол-көлік оқиғасына қатысты ҚР ҚК-нің 345-бабы 3-бөлігіне (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) сәйкес, сотқа дейінгі тергеу басталды. Тергеу сонымен қатар, бөтен көлікті заңсыз иелену, бөтеннің мүлкін ұрлау деректері бойынша да жүргізілетін болады. Күдікті ҚР ҚПК-нің 128-бабына сәйкес уақытша ұстау изоляторына қамалды», – деді полиция өкілі.