Қыздың айтуынша, ол Лаосқа клиенттермен жұмыс істейтін менеджер ретінде барған. Ал жұмысқа орналастыру бойынша келіскен компания өзін инвестицияға арналған платформа ретінде таныстырған. Анель Бермағанбетованың сөзінше, іс жүзінде компанияның алаяқтыққа қатысы бар болып шыққан.
"Қазір төртінші күн Лаоста бөлмеден шықпай отырмын, ешкімді кіргізбедім. Кеше істің басы-қасында жүрген қытайлықпен сөйлесіп, мұндай жағдайда жұмыс істемейтінімді айтуға тырыстым. Ұшаққа шығынымды өтейтінімді, үйге қайтатынымды жеткізгім келді. Ол "Бұл саған келіп-кететін жер емес, бір жылға қалуың керек" деп айтты", - деп жазды ол. Қыздың мәлімдемесіне қатысты Қазақстан ІІМ пікір білдірді.