Жамбыл облысының Полиция департаменті Есірткі қылмысына қарсы іс -қимыл басқармасының және Полиция департаменті Жергілікті полиция қызметінің қызметкерлері бірлесіп Тараз қаласы бойынша рейд жұмыстарын жүргізді. 2022 жылдың 22-24 шілде күндері аралығында жүргізілген тексеру шаралары синтетикалық заттарды тұтыну деректерін анықтауға арналды.
Тараз қаласында орналасқан көңіл көтеру орталықтарына жүргізілген рейд нәтижесінде 25 ойын-сауық орындарында түрлі құқық бұзушылықтар анықталды. Атап айтар болсақ, ҚР Әкімшілік құқық бұзушылық туралы кодексінің 441- бабы бойынша, яғни қоғамдық орындарда тыйым салынған темекі өнімдерін (кальян) пайдаланудың 12 дерегі анықталған.
Құқық бұзушылықтарды, оның ішінде есірткі, психотроптық және синтетикалық заттарды тұтынуды анықтау бойынша жүргізілген рейдтік шара барысында сондай- ақ, тыйым салынған темекі өнімдерін пайдаланушы әкімшілік жазаға тартылатындығы туралы түсіндіру жұмыстары жүргізілді. Тексеру жүргізілген барлық ойын-сауық орындарына келушілерге Қазақстан Республикасының Бас мемлекеттік санитарлық дәрігерінің 2013 жылдың 14 наурызындағы қаулысына сәйкес қоғамдық жерлерде кальян шегуге тыйым салынғандығы ескертіліп, ақпараттық парақшалар таратылды.
Рейдтік шаралар барсында Тараз қаласындағы ойын-сауық орындарының әкімгерлеріне есірткі құралдарын, психотроптық заттарды, тыйым салынған темекі өнімдерін өткізу мен тұтынуға жол бергендігі үшін кәсіпкерлік субъектілеріне айыппұл салынып, әкімшілік жауапкершілікке тартылатындығы ескертілді. Мұндай айыппұлдар шағын кәсіпкерлік субъектілеріне 150 мың теңге болса, орта кәсіпкерлік субъектілеріне салынатын айыппұл 300 мың теңге көлемінде екен. Жамбыл облысы Полиция департаменті Есірткі қылмысына қарсы іс-қимыл басқармасының дерегі бойынша ҚР Қылмыстық кодексінің 299-1 –бабы, яғни есірткі құралдарын насихаттау және заңсыз жарнамалау бойынша қылмыстық жауапкершілік үшін үш жылға дейінгі мерзімге бас бостандығынан айыру түріндегі жаза қарастырылған.
Айта кетейік, Жамбыл облысы ПД Есірткі қылмысына қарсы іс-қимыл басқармасының қызметкерлері бұдан бөлек нашақорлықпен күрес шараларын күшейту мақсатында Тараз қаласы ішкі саясат бөлімі «Жастар ресурстық орталығымен» бірлесіп жастар арасында есірткі өнімдерін тұтынудың зияндылығы жайында түсіндіру бойынша шаралар өткізіп тұрады.