ШҚО бойынша Есірткі қылмысына қарсы іс-қимыл басқармасының қызметкерлері ҚР Ұлттық ұланның 5518 әскери бөлімінің арнайы жасағымен бірлесе отырып, облыстың орталық аумағында құпия орындарда сақтау арқылы психотропты заттарды аса ірі мөлшерде өткізумен айналысқан қылмыстық топтың әрекетін әшкереледі, деп хабарлайды kazlenta.kz.
Облыс орталығының аумағында құпия орындарда сақтау арқылы синтетикалық психотроптық заттарды өткізумен айналысқан қылмыстық топтың құрамына 19 бен 26 жас аралығындағы 6 ер адам кіргені анықталды.
- Фигуранттарды ұстауға дейін олардың жасырып үлгерген құпия орындарынан полицейлер синтетикалық есірткі заттары бар түйіншектерді тәркіледі. Мамандардың жүргізген зерттеу нәтижелеріне сәйкес, полиэтилен пакеттерінде шамамен 3 500 бір реттік дозада синтетикалық психотроптық зат болған, - деді ШҚО ПД бастығы Сағат Мадиев.
Жүргізілген іс-шаралар барысында жедел уәкілдер заңсыз айналымнан 1 кг-ден астам есірткіні тәркіледі. Тәркіленген есірткі заттардың қара нарықтағы құны шамамен 35 млн.теңгені құрайды.
Күдіктілер Уақытша ұстау изоляторына қамалды. ҚР ҚК-нің 297-бабының 3-бөлігімен сотқа дейінгі тергеп-тексеру жүргізілуде.
Басқа да ақпарат тергеу мүддесіне байланысты жария етуге жатпайды.