Ресей Федерациясының Тула облысында оқушылар арасында шахматтан XX Азия чемпионаты өтті. Халықаралық жарыста елордалық шахматшылар сәтті өнер көрсетіп, 15 медаль жеңіп алды, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Турнирге 12 елден 314 жас шахматшы қатысты. Олардың қатарында Қазақстанның 22 өкілі болды.
Чемпионат ұлдар мен қыздар арасында алты жас санаты бойынша жеке өткізілді. Қатысушылар шахматтың үш түрінен: классика, рапид және блиц бойынша бақ сынады.
Турнир қорытындысы бойынша Қазақстан құрамасы 20 медаль жеңіп алды. Оның ішінде 3 алтын, 10 күміс және 7 қола жүлде бар. Ұлттық құраманың жалпы нәтижесіне Астананың жас шахматшылары елеулі үлес қосып, 15 медаль иеленді.
Чемпионаттың басты қаһармандарының бірі – елордалық 14 жастағы шахматшы Алдияр Жауынбай. Ол 15 жасқа дейінгі санатта классикалық шахматтан жарыс аяқталуына бір тур қалғанда-ақ Азия чемпионы атанды.
Алдияр мүмкін болған 9 ұпайдың 7,5 ұпайын жинады. Сонымен қатар рапидтен күміс, блицтен қола медаль жеңіп алды.
Елордалық команда қоржынына Әлихан Сағынтаев үш медаль салды. Ол 11 жасқа дейінгі санатта блицтен Азия чемпионы атанып, классикалық шахмат пен рапидтен екі күміс жүлдеге ие болды.
Амалия Едрешeва да сәтті өнер көрсетіп, 9 жасқа дейінгі қыздар арасында классикалық шахматтан Азия чемпионы атанды.
Рапид жарысында жас шахматшы қола медаль жеңіп алды.
7 жасқа дейінгі санатта өнер көрсеткен Әлинұр Бауыржан тағы үш жүлде иеленді. Ол блицтен күміс, классикалық шахмат пен рапидтен қола медаль алды.
Әлімжан Жауынбай екі медаль жеңіп алды. 13 жасқа дейінгі санатта ол классикалық шахматтан екінші, рапидтен үшінші орынға ие болды.
Қыздар арасында Ақнұр Мамақова көзге түсті. Ол 15 жасқа дейінгі санатта рапид пен блицтен күміс медаль жеңіп алып, тұғырдың екінші сатысына екі рет көтерілді.