Түркістан облысында полиция қызметкерлері жол-көлік оқиғаларының алдын алу және болдырмау мақсатында профилактикалық күшейтілген іс-шаралар өткізуде, деп хабарлайды kazlenta.kz тілшісі Polisia.kz сайтына сілтеме жасап.
Нәтижесінде тәулік ішінде жол қозғалысы ережелерін бұзудың 30-ға жуық дерегін анықтады. Іс-шара барысында тәртіп сақшылары бақылау жүргізу кезінде дрон құрылғысын пайдаланды. Атап айтқанда Сайрам ауданы көшелерінің бірінде жаяу жүргіншілерге жол бермеген Nissan автокөлігінің жүргізушісі анықталып, әкімшілік шара қолданылды.
Дәл осындай жайтпен 12 автокөлік жүргізушісі тіркелген. Айта кететін жайт Сайрам ауданының аумағында жыл басынан бері жаяу жүргіншілердің қатысуымен 51 жол-көлік оқиғасы тіркелді. Полиция қызметкерлері жол қозғалысына қатысушыларды белгіленген ережелерді қатаң сақтауға шақырады. Әсіресе жүргізушілер жаяу жүргіншілер өткеліне жақындаған кезде жылдамдықты төмендетіп, жаяу жүргіншілерге жол беруге міндетті.