Алматылық спортшы Әнуар Ақылбеков Қытайдың Лишуй қаласында өткен роллер-фристайлдан әлем кубогы кезеңінде топ жарып, алтын медаль иеленді. Бұл Қазақстанның роллер-спорттан әлем кубогы кезеңдеріндегі жарыстар тарихындағы тұңғыш алтыны. Бұл туралы Алматы қаласы Спорт басқармасының өкілдері мәлім етті, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Лишуйде өткен халықаралық дода World Skate ұйымының қолдауымен ұйымдастырылып, оған әлемнің түкпір-түкпірінен 200-ден астам мықты спортшы қатысты. Олар роллер-фристайлдың Classic Slalom, Speed Slalom, Pair Slalom, Battle, Jump және Slides сынды бірнеше бағыты бойынша өзара бақ сынады.
Қазақстандық спортшы Slides бағытында үздік нәтиже көрсетіп, жеңіс тұғырының ең биік сатысына көтерілді. Бұл дисциплинада спортшылар роликті конькимен күрделі техникалық сырғанау элементтерін шеберлікпен орындайды. Жарыс барысында спортшылардың элементтерінің күрделілігі, жылдамдығы, дәлдігі мен орындалу сапасы бағаланады.
«Бұл біз үшін үлкен жеңіс. Спортымыздың тарихын өзіміз жазып, ең ірі халықаралық жарыстарда Қазақстанның туын көтеріп жүргенімізге өте қуаныштымын. Алға қарай қадам басып келеміз», – деді Әнуар Ақылбеков.
Маусымдағы маңызды халықаралық жарыстардың біріне дайындықты алматылық спортшылар Halyk Arena аумағында өткізді. Мұнда жаттығу процесіне қажетті барлық жағдай жасалған.
Роллер-спорт 14-тен астам бағытты біріктіреді. Бұл спорт түрі Дүниежүзілік және Азия ойындары секілді ірі халықаралық көпсалалы жарыстардың бағдарламасына енгізілген.