Жақын арада Алматы AirAsia әуе компаниясының жаңа халықаралық жарнамалық науқаны аясында Оңтүстік-Шығыс Азияның миллиондаған тұрғынына таныстырылады, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Азиядағы ең ірі лоукостерлердің бірі Алматының туристік әлеуетін насихаттайтын жарнамалық бейнероликтер топтамасын түсіруде. Онда қаланың көркем табиғаты, танымал туристік орындары, заманауи сәулеті мен қайталанбас атмосферасы кеңінен көрсетіледі.
Бейнероликтер AirAsia-ның әлеуметтік желілерінде, цифрлық платформаларында және Куала-Лумпур қаласындағы LED-экрандарда көрсетіледі.
Жарнамалық науқанды әзірлеу мен ілгерілету жұмыстары толықтай AirAsia компаниясының қаражаты есебінен жүзеге асырылады, бюджет қаражаты тартылмайды. Бұл жоба Алматының халықаралық танымалдығын арттырып, Оңтүстік-Шығыс Азия елдерінен келетін туристер санын көбейтуге ықпал етеді.