Қазақстан Республикасы Сыртқы істер министрінің орынбасары Әлібек Қуантыров Өңірлік инвестициялық штабтың отырысына қатысты. Мемлекеттік органдар мен бизнес қауымдастық өкілдерінің қатысуымен өткен жиында инвестициялық жобаларды сүйемелдеу, инвестициялық ахуалды жақсарту және инвесторлар алдында туындайтын мәселелерді жедел шешу мәселелері қаралды, деп хабарлайды kazlenta.kz тілшісі ҚР СІМ баспасөз қызметіне сілтеме жасап.
Ә. Қуантыров Алматы облысының еліміздің экономикалық өсімінің негізгі орталықтарының бірі екенін атап өтіп, өңірдің агроөнеркәсіптік, индустриялық және көлік-логистикалық әлеуетіне ерекше тоқталды.
«Алматы облысы – еліміздің стратегиялық маңызы бар агроөнеркәсіптік, индустриялық және көлік-логистикалық өңірі әрі Қазақстан экономикасының негізгі өсу нүктелерінің бірі», – деді Сыртқы істер министрінің орынбасары.
Сапар аясында Ә. Қуантыров өңірде іске асырылып жатқан бірқатар ірі инвестициялық жобалардың жүзеге асу барысымен танысып, Carlsberg Central Asia, PepsiCo Central Asia, Asia United Steel компанияларының кәсіпорындарын, сондай-ақ LG Electronics және Hi Air Korea компанияларымен бірлескен жобаны іске асырып жатқан Алматы желдеткіш зауытын аралады.
Сапар қорытындысы бойынша инвестициялық жобаларды уақтылы іске асыру, жаңа жұмыс орындарын ашу және өңірдің өнеркәсіптік әлеуетін нығайту мақсатында орталық және жергілікті мемлекеттік органдардың инвесторлармен өзара тиімді іс-қимылын одан әрі жалғастырудың маңыздылығы атап өтілді.
Қазіргі таңда өңірдің инвестициялық портфелі жалпы құны шамамен 8 трлн теңгені құрайтын 283 жобаны қамтиды. Оларды іске асыру нәтижесінде 154 мыңнан астам тұрақты жұмыс орнын құру көзделген. Инвестициялық жобалар Ұлттық цифрлық инвестициялық платформа және инвесторларды қолдаудың арнайы тетіктері арқылы сүйемелденуде.