Қарағанды облысында екі бірдей ұрлықтың беті ашылды, деп хабарлайды kazlenta.kz тілшісі Polisia.kz сайтына сілтеме жасап.
Қарағанды облысының Бұқар жырау ауданында полицейлер қысқа уақыт ішінде тұрғындарды алаңдатқан екі бірдей ұрлық қылмысын ашып, күдіктіні ұстады. Жедел жүргізілген іздестіру іс-шараларының нәтижесінде көрші ауылдың 42 жастағы тұрғынының қылмысқа қатысы бары анықталып, ол уақытша ұстау изоляторына қамалды. Алғашқы оқиға аудан ауылдарының бірінде тіркелген. Белгісіз адам 40 жастағы тұрғынның үйіне заңсыз кіріп, отбасының демалысына деп ұзақ уақыт бойы жинаған бір миллион теңгеге жуық ақшасын қолды еткен. Бұл жәбірленуші отбасы үшін елеулі материалдық шығын ғана емес, көптен күткен жоспарларының күл-талқан болуына себеп болды. Аталған дерек бойынша тергеу басталғаннан кейін көп ұзамай дәл сол ауылдан тағы бір ұрлық туралы хабарлама келіп түсті. Бұл жолы 45 жастағы тұрғынның құны 89 мың теңге тұратын телефоны ұрланған.
Қылмыстарды ашу мақсатында жүргізілген жедел-іздестіру іс-шараларының нәтижесінде тәртіп сақшылары күдіктінің ізіне түсіп, оны қолға түсірді. Тінту барысында одан екі ұрлыққа да қатыстылығын дәлелдейтін заттай айғақтар тәркіленді. Қазіргі уақытта күдікті уақытша ұстау изоляторына қамалды. Тергеу барысында ол өз кінәсін толық мойындап, жәбірленушілердің үйлеріне қалай кіргенін және ұрлықтарды қалай жасағанын оқиға орнында көрсетіп берді. Полицейлер ұсталған азаматтың осыған ұқсас өзге де қылмыстарға қатысы бар-жоғын анықтау бағытында тергеу амалдарын жалғастыруда. Полиция азаматтарды өз мүлкінің қауіпсіздігіне мұқият қарап, күмәнді жағдайлар байқалған жағдайда бірден полицияға хабарлауға шақырады.