Өскемен қаласы Ертіс полиция бөлімінің қызметкерлері алкоголь өнімдерін заңсыз сату фактілерін анықтау бойынша тұрақты негізде профилактикалық іс-шаралар жүргізіп жатыр, – деп хабарлайды kazlenta.kz тілшісі Polisia.kz сайтына сілтеме жасап.
Бұл жұмыс құқық бұзушылықтардың алдын алуға, қоғамдық тәртіпті қамтамасыз етуге және заңсыз кәсіпкерлік қызметтің жолын кесуге бағытталған. Осы жылдың басынан бері полицейлер алкоголь өнімдерін заңсыз сатудың 34 фактісінің жолын кесті. Заңсыз айналымнан 1 тонна 311 литр спиртті өнім тәркіленді. Барлық құқық бұзушы мемлекеттік тіркеусіз және қажетті рұқсат құжаттарынсыз кәсіпкерлік қызметпен айналысқаны үшін әкімшілік жауапкершілікке тартылды.
Атқарылып жатқан жұмыстар жүйелі сипатқа ие. Мәселен, 2025 жылы полиция қызметкерлері алкоголь өнімдерін заңсыз сатудың 21 фактісін анықтап, заңсыз айналымнан 825 литр спиртті өнімді тәркілеген еді. Ал 2024 жылы 26 фактінің жолы кесіліп, 650,5 литр тәркіленген еді. Анықталған фактілердің едәуір бөлігі Асқартау көшесіне тиесілі. Жыл басынан бері бұл көшеде алкоголь өнімдерін заңсыз сатудың 16 фактісінің жолы кесіліп, заңсыз айналымнан 1 тонна 272 литр спиртті өнім алынды. Заңнамада көзделген барлық процестік іс-шаралар аяқталғаннан кейін тәркіленген спиртті өнім белгіленген тәртіппен жоюға жатады. Мұндай құқық бұзушылықтардың алдын алу және оларды дер кезінде анықтау үшін профилактикалық іс-шаралар күн сайын жүргізіледі. Ерекше назар аударуды талап ететін орындарда патрульдік полиция нарядтары күнделікті қызмет атқарады. Сондай-ақ жедел басқару орталығының бейнебақылау жүйесі арқылы жедел жағдайға мониторинг жасалып, түскен хабарламаларға дер кезінде ден қоюға және қолданыстағы заңнама аясында шара қолдануға мүмкіндік береді.