Алматы облысы Қазақстанның экспортқа бағдарланған жетекші аграрлық өңірлерінің бірі ретіндегі әлеуетін нығайтуды жалғастыруда. Өңір экспортының жалпы көлемінің 60 пайыздан астамын ауыл шаруашылығы өнімдері мен оларды қайта өңдеу өнімдері құрайды, деп хабарлайды kazlenta.kz тілшісі ҚР АШМ баспасөз қызметіне сілтеме жасап.
Өткен жылдың қорытындысы бойынша агроөнеркәсіптік кешен өнімдерінің экспорт көлемі 491 млн АҚШ долларынан асты. Сыртқы нарықтарда ет, құс еті, жеміс-жидек, көкөніс, сүт өнімдері және сусындар жоғары сұранысқа ие.
Өңірдің экспорттық әлеуетін арттыруға жергілікті кәсіпорындар елеулі үлес қосып келеді. 2025 жылы Shin-Line компаниясы Қытайға, Сауд Арабиясына және ТМД елдеріне рекордтық көлемде – 15 мың тонна балмұздақ экспорттады. Fruit Art және LST AGRO кәсіпорындары өндіретін қызанақ пен сублимацияланған өнімдердің 90 пайызы Ресейдің ірі сауда желілеріне жөнелтіледі. Ал RG Brands Kazakhstan компаниясы шырындар, алкогольсіз сусындар және шай өнімдерін экспорттау есебінен жыл сайын 60 млн АҚШ доллары көлемінде экспорттық түсім қалыптастырады.
Жалпы, өңірдің агроөнеркәсіптік кешен өнімдері әлемнің 50-ден астам еліне экспортталады. Орталық Азия мемлекеттері мен ТМД елдерінен бөлек, жергілікті өндірушілердің өнімдері Германияға, Польшаға, Румынияға, Болгарияға, Түркияға, Біріккен Араб Әмірліктеріне, Иранға, Иракқа және Пәкістанға жеткізіледі.
Өңірдің негізгі сауда серіктестерінің бірі – Өзбекстан. Соңғы үш жылда бұл елге экспорт көлемі екі есеге жуық өсіп, 110 млн АҚШ долларынан 203 млн АҚШ долларына дейін ұлғайды. Өзбекстан нарығында ұн мен сүт өнімдеріне сұраныс жоғары.
Өндірістік әлеуетті жаңғырту, инвестициялар тарту, заманауи технологияларды енгізу, сондай-ақ агроөнеркәсіптік кешенді мемлекеттік қолдау шараларының нәтижесінде экспорт көлемінің арта түсті. Осының барлығы қазақстандық агроөнеркәсіптік кешен өнімдерінің халықаралық деңгейдегі үлесін одан әрі кеңейтуге жол ашып отыр.