Энергетика министрлігі көмір химиясын дамыту бағытын көмір өнеркәсібін жаңғыртудың және шикізатты терең өңдеу арқылы жоғары қосылған құны бар өндірістер қалыптастырудың негізгі тетіктерінің бірі ретінде қарастырады, деп хабарлайды kazlenta.kz тілшісі ҚР Энергетика министрлігіне сілтеме жасап.
Бүгінде көмір химиясы саласында үш ірі жоба жүзеге асуда. Қарағанды облысында жылына 1 млн тонна металлургиялық кокс өндіретін зауыттың құрылысы жүргізілуде. Жобаны іске асыру нәтижесінде 500-ге дейін жаңа жұмыс орны ашылады. Сонымен қатар Павлодар және Қарағанды облыстарында көмірден дизель отынын өндіретін, әрқайсысының қуаты жылына 100 мың тоннаны құрайтын екі жоба жүзеге асырылуда.
Бұдан бөлек, тағы үш перспективалы жоба пысықталуда. Қарағанды облысында таскөмір шайырын қайта өңдеуді, бензол өндіруді және кокс газын тазартуды қамтитын кокс-химия өндірісін құру мәселесі қарастырылуда. Абай облысында аммиак пен карбамид өндіру жобасы пысықталуда. Тағы бір перспективалы жоба көмірден газ өндіруді көздейді. Қазіргі уақытта жобаны іске асыру алаңы айқындалуда.
Қазақстанның бай көмір қоры жаңа жоғары технологиялық өндірістер құруға және көмірді терең өңдеу мүмкіндіктерін кеңейтуге мүмкіндік береді.