Шығыс Қазақстан облысында полиция қызметкерлері интернет-дүкен арқылы есірткіні заңсыз таратумен айналысқан екі адамның қылмыстық әрекетінің жолын кесті, – деп хабарлайды kazlenta.kz тілшісі Polisia.kz сайтына сілтеме жасап.
Жедел-іздестіру іс-шаралары барысында басқа өңірлерден келген 34 жастағы әйел және 22 жастағы ер адам ұсталды. Олар тыйым салынған заттарды өлшеп-қаптаушы және тасымалдаушы қызметін атқарған. Күдіктілер мінген автокөлікті тексеру кезінде есірткі заттары салынған орамдар, сондай-ақ оларды өлшеп-қаптауға және буып-түюге арналған құралдар табылып, тәркіленді.
Сараптама қорытындысына сәйкес, тәркіленген заттардың қатарында жалпы салмағы шамамен 900 грамм болатын синтетикалық α-PVP есірткісі және 100 грамға жуық мефедрон болған. Тәркіленген есірткі заттарының жалпы салмағы бір келіге жеткен. Аталған факті бойынша сотқа дейінгі тергеп-тексеру басталды.