Ішкі істер министрлігі "Заң мен Тәртіп" қағидаты аясында ел аумағында синтетикалық есірткіні тарату арналарының жолын кесу бойынша іс-шараларды жалғастыруда. Мамыр айының екінші онкүндігінде есірткі қылмысына қарсы іс-қимыл бөліністерінің қызметкерлерімен синтетикалық есірткінің бірқатар аса ірі партияларын заңсыз айналымға шығару жолдары кесілді, - деп хабарлайды kazlenta.kz тілшісі Polisia.kz сайтына сілтеме жасап.
Алматы қаласында жүргізілген жедел-іздестіру іс-шаралары барысында қала тұрғыны ұсталып, одан екі килограмнан астам альфа-PVP синтетикалық есірткісі тәркіленді. Күдікті өз кінәсін мойындады. Ең ірі мегаполисте тағы бір күдікті ұсталды. Жігіттің тұрғылықты жерін тінту кезінде шамамен бір килограмм синтетикалық есірткі мен психотроптық әсері бар заттар дәрілер тәркіленді. Шығыс Қазақстан облысында интернет-дүкен кураторының тапсырмасымен өңірлерге есірткі тасымалдаумен айналысқан Алматы облысының тұрғыны ұсталды. Күдіктіден екі килограмнан астам есірткі тәркіленді. Қарағанды облысы Алматы - Екатеринбург тасжолында ірі көлемдегі синтетикалық есірткі заттарын тасымалдаған есірткі таратушы ұсталды. Автокөлік салонын тінту барысында бір килограмм альфа-PVP синтекалық есірткісі тәркіленді.