СҚО-да полиция қызметкерлері ведомство ардагерлеріне тұрақты түрде қамқорлық көрсетіп келеді. Жеңіс күніне орай олар Отан соғысы жылдарында тылда еңбек еткен ішкі істер органдарының ардагерлерін арнайы құттықтады, – деп хабарлайды kazlenta.kz тілшісі Polisia.kz сайтына сілтеме жасап.
Солтүстік Қазақстан облысы полиция департаментінің басшылығы мен Ардагерлер кеңесінің өкілдері, сондай-ақ СҚО ПД госпиталі мен емханасының медицина қызметкерлері отставкадағы милиция майоры, 93 жастағы Владимир Ипполитовтың үйіне барды. Владимир Ипполитов ішкі істер органдарында ұзақ жыл қызмет етіп, өз еңбек жолында облыстық ішкі істер басқармасының кезекші бөлімінде аға инспектор сияқты жауапты қызметтер атқарып, зейнетке шыққан ардагер. Сондай-ақ тәртіп сақшылары Валентина Волкова мен Любовь Таратутаны да Жеңіс күнімен құттықтады.
Екі ардагер де 1936 жылы дүниеге келген, соғыс жылдарындағы қиын кезеңді бастан өткеріп, кейін облыстық милицияда абыройлы қызмет атқарған. Полицейлер ардагерлерге гүл шоқтары мен естелік сыйлықтар табыстап қана қоймай, медициналық тексеру жүргізіп, тыл еңбеккерлері мен олардың жақындарына кеңес берді. Мұндай кездесулер тек мереке қарсаңында ғана емес, тұрақты түрде ұйымдастырылып келеді. Ішкі істер органдарының ардагерлері әрдайым әріптестерінің құрметі мен қамқорлығына бөленіп келеді.