Бүгін ҚР Премьер-министрі Олжас Бектеновтің төрағалығымен өткен Үкімет отырысында биылғы 3 айдағы еліміздің әлеуметтік-экономикалық дамуы мен республикалық бюджеттің атқарылу қорытындылары қаралды. Оған облыс әкімінің уақытша міндетін атқарушы Тілепберген Каюпов селекторлық режимде қатысты, деп хабарлайды kazlenta.kz тілшісі БҚО әкімдігінің баспасөз қызметіне сілтеме жасап.
Алғашқы тоқсанның қорытындысы бойынша өңірде негізгі 7 көрсеткіштің алтауында өсім бар. Атап айтқанда, ауыл шаруашылығы өнімі 4,6%-ға, инвестициялар көлемі 22,3%-ға өсті. Құрылыс жұмыстары 17,4%-ға артып, 92,5 мың шаршы метр тұрғын үй пайдалануға берілді. Сондай-ақ, ішкі сауда мен көлік қызметтері саласында да тұрақты даму қарқыны сақталып отыр.
Бюджеттің кіріс бөлігі бойынша жоспар 131,4%-ға орындалып, қазынаға 135,1 млрд теңге түсті. Облыстың меншікті кірістері 59,8 млрд теңгені құрап, межеден 20,5%-ға артық орындалды. Республикалық бюджеттен бөлінген нысаналы трансферттердің игерілуі 69,7%-ды құрады. Қаражаттың толық игерілмеуі Жайық өзенінде нығайту жұмыстарына бағытталған 0,8 млрд теңгенің республикалық бюджеттен кеш аударылуымен байланысты болды. Қазіргі таңда бұл бағыттағы жұмыстарды жеделдету және қаржыны тиімді пайдалану мақсатында тиісті іс-шаралар іске асырылуда. Өңірдің экономикалық көрсеткіштерін одан әрі жақсарту үшін барлық қажетті ресурстар жұмылдырылған.
Үкімет отырысының қорытындысы бойынша облыс әкімінің уақытша міндетін атқарушы Тілепберген Каюпов жергілікті жауапты құрылымдар мен басқарма басшыларына нақты міндеттер жүктеді. Ол өнеркәсіп саласындағы көрсеткіштерді қалпына келтіруді, инвестициялық жобаларды сапалы сүйемелдеуді және бюджет қаражатын, соның ішінде республикалық трансферттерді уақытылы игеруді тапсырды.