Елордада әлеуметтік маңызы бар азық-түлік тауарларының бағасын бақылау бойынша жүйелі жұмыс жалғасып жатыр. Кезекті көшпелі отырыс аясында делдалдық схемаларды тергеу жөніндегі өңірлік комиссия «Шарын» және «Алаш» көтерме базарларында мониторинг жүргізді, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Мониторингке қала әкімдігінің Инвестициялар және кәсіпкерлікті дамыту басқармасының қызметкерлері, сондай-ақ сауда және тұтынушылардың құқықтарын қорғау, мемлекеттік кірістер, техникалық реттеу және метрология департаменттерінің, полицияның және басқа да тиісті мемлекеттік органдардың өкілдері қатысты. Кәсіпкерлерге заңнама талаптары түсіндіріліп, әлеуметтік маңызы бар азық-түлік тауарларына 15 пайыздан аспайтын сауда үстемесін сақтау қажеттігі ескертілді.
Сонымен қатар ақпараттық жүйелерді міндетті түрде пайдалану талабы ерекше назарға алынды, өйткені оларды қолданбау айналым деректерінің бұрмалануына және делдалдық схемалардың пайда болуына әкеледі. Осыған байланысты мұндай субъектілер бақылаудың басым бағытына енгізілген.
Бақылау іс-шараларының қорытындысы бойынша Сауда және тұтынушылардың құқықтарын қорғау департаменті анықталған бұзушылықтарды жою туралы ұйғарымдар береді. Талаптар орындалмаған жағдайда, соның ішінде ақпараттық жүйелерді міндетті түрде пайдаланбағаны үшін әкімшілік жауапкершілік қарастырылған. Ол айыппұл салуды және заңнамада белгіленген тәртіппен неғұрлым қатаң шараларды қолдануды, қажет болған жағдайда материалдарды сот тәртібімен қарауды қамтиды.