Орал қаласының орталығы мен «Ақжайық» шағынауданын байланыстыратын жаңа көпір мен орамішілік жолдардың құрылысына дайындық басталды. Салтанатты рәсімде келешекке жолдауы бар уақыт капсуласы салынды, деп хабарлайды kazlenta.kz тілшісі БҚО әкімдігіне сілтеме жасап.
Облыс әкімі Нариман Төреғалиев жобаның стратегиялық маңызына тоқталды.
Бүгінгі таңда Зачаган кентінде 80 мыңнан астам адам тұрады. Қала орталығына көлік қатынасы жалғыз «Динамо» өткеліне тәуелді. Жаңа көпір пайдалануға берілгенде жүктеме азайып, кептеліс мәселесі толық шешілмек. Болашақта «Ақжайық» шағынауданында да халық саны артатынын ескерсек, бұл магистраль қаланың ең маңызды көлік күретамырына айналады.
Техникалық сипаттама бойынша көпірге апаратын I санатты жолдың ұзындығы 4 шақырымды, ал өткелдің ұзындығы 220 метрді құрайды. Мамандардың есебінше, бұл нысан тәулігіне 30 мыңға жуық көлікті өткізуге қауқарлы. Сонымен қатар, бұл жол «Ақтөбе-Орал-РФ шекарасы» трассасына тікелей шығуға мүмкіндік беріп, өңірдің транзиттік әлеуетін арттырады.
Қазіргі уақытта «Ақжайық» шағынауданында үш мыңнан астам адам қоныстанған. Келешекте мұнда ондаған көпқабатты тұрғын үйлер мен 60-қа жуық әлеуметтік нысан бой көтереді.