Денсаулық сақтау вице-министрі Тимур Мұратов Алматы облысына жұмыс сапары барысында Еңбекшіқазақ ауданында күрделі жөндеуден кейін жаңартылған перинаталдық орталықтың ашылуына қатысты, деп хабарлайды kazlenta.kz тілшісі ҚР Денсаулық министрлігіне сілтеме жасап.
Аумағы 10,8 мың шаршы метрді құрайтын нысан «Ауылдық денсаулық сақтауды жаңғырту» ұлттық жобасы шеңберінде жаңғыртылды.
Жүргізілген жұмыстар 2007 жылы салынған ғимаратты толық жаңартуға, оның ішінде инженерлік инфрақұрылым мен медициналық жабдықтарды жаңалауға мүмкіндік берді. 110 төсекке есептелген орталықтың базасында босандыру және неонатологиялық көмек көрсетудің толық циклі ұйымдастырылды. Бұл денсаулық сақтау саласындағы мемлекеттік кепілдіктерді іс жүзінде іске асырудың нақты үлгісіне айналды.
Сапар барысында Т. Мұратов өңірдегі медициналық ұйымдардың басшыларымен кездесу өткізіп, онда конституциялық реформаны талқылау негізгі тақырып болды.
Вице-министр алдағы референдумға шығарылған елдің Негізгі заңына енгізілетін жаңашылдықтарды түсіндірді.
Атап өтілгендей, Конституцияға енгізілетін өзгерістер азаматтардың іргелі құқықтарын, соның ішінде сапалы әрі қолжетімді медициналық көмек алу құқығын нығайтуға бағытталған.
Т. Мұратовтың айтуынша, алдағы референдум медицина мен фармацевтика саласына заманауи технологияларды енгізуді талап ететін конституциялық кепілдіктерді қамтамасыз етудің маңызды кезеңіне айналады.
Ғылымды қажетсінетін өндіріс перспективалары вице-министрдің Ядролық физика институтының және Orhun Medical компаниясының өкілдерімен қорытынды кездесуінде талқыланды. Тараптар өңірлік деңгейде онкологиялық ауруларды диагностикалау мен емдеуге қажетті отандық радиофармацевтикалық препараттар өндірісін дамыту мүмкіндіктерін қарастырды.
