Елордадағы Достық үйі Алғыс айту күніне орай «Шарапат» әлеуметтік қызмет көрсету орталығында қайырымдылық іс-шарасын ұйымдастырды, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Іс-шараға ұлттық мәдени орталықтардың өкілдері саналатын 10 шығармашылық ұжым қатысты. Олардың қатысуымен қарттарға арналған концерттік бағдарлама ұсынылды. Жас өнерпаздар ән айтып, би билеп, көрермендерге көтеріңкі көңіл күй сыйлады. Мерекелік кеш аяқталғаннан кейін ұйымдастырушылар орталық тұрғындарына азық-түлік себеттері мен тәттілер табыстады.
«Шарапат» әлеуметтік қызмет көрсету орталығы зейнет жасына жеткен азаматтар мен I және II топтағы мүгедектігі бар, жалғызбасты әрі күнделікті күтімді қажет ететін жандарға арналған.
Орталықта 400 адамды тұрақты немесе уақытша орналастыруға мүмкіндік бар. Орталық директорының орынбасары Сауле Қайырованың айтуынша, мұнда түрлі ұлт өкілдері тұрады. Мекеме Қазақстан халқы ассамблеясымен, сондай-ақ елордадағы бірқатар ұйыммен, оның ішінде мектептер мен балабақшалармен тығыз байланыс орнатқан. Оқушылар мен мектепке дейінгі ұйым тәрбиеленушілері орталықта мерекелік іс-шаралар өткізеді. Қызмет алушылар әдеби кештерге қатысып, түрлі үйірмелерге барады.
