Абай облысында гаражында марихуана сақтаған тұрғын қоғамдық жұмыстарға тартылды, – деп хабарлайды kazlenta.kz тілшісі Polisia.kz сайтына сілтеме жасап.
Абай өңірінің 52 жастағы тұрғыны тау баурайында келе жатып жабайы марихуана өсімдігін байқаған. Ер адам оны жұлып алып, үйіне әкеліп, есірткіні жеке пайдалану үшін гаражда сақтаған. Сот оны кінәлі деп тауып, алпыс сағат мерзімге қоғамдық жұмыстарға тарту жазасын тағайындады. Үкім заңды күшіне енгеннен кейін сотталған адам Аягөз аудандық пробация қызметіне тіркелді. Тіркеу кезінде онымен заңға бағынатын мінез-құлықты қалыптастыруға және қайталанатын құқық бұзушылықтардың алдын алуға бағытталған тәрбие және құқық түсіндіру жұмыстары жүргізілді. Сот тағайындаған жазаны орындау үшін ер адам Аягөз аудандық мәдениет үйіне жұмысшы болып жұмысқа орналасты. Қазіргі уақытта ол пробация қызметкерлерінің бақылауымен аумақты тазалаумен, қар тазалаумен және басқа да қоғамдық пайдалы жұмыстарды орындаумен айналысады.
— Пробация қызметінің негізгі мақсаты — сотталғандарды түзетуге және оларды қайта әлеуметтендіруге жәрдемдесу. Қоғамдық жұмыстар мен алдын алу жұмыстары заңға жауапкершілікпен қарауды қалыптастыруға және қайталанатын құқық бұзушылықтардың алдын алуға көмектеседі, — деп атап өтті Аягөз аудандық пробация қызметінің аға инспекторы Ермек Қалиев.