2025 жылғы 1 қазандағы жағдай бойынша ерікті қоныс аудару шеңберінде жұмыс күшінің ұтқырлығын арттыру үшін жұмыс күші артық өңірлерден жұмыс күші тапшы өңірлерге 5 213 адам, оның ішінде 1 725 қандас және 3 488 қоныс аударушы көшіп келді. Барлық қоныс аударушыларға мемлекеттік қолдау шаралары көрсетілді. Осы жылдың соңына дейін 9 653 адамды көшіру жоспарлануда, деп хабарлайды kazlenta.kz тілшісі ҚР Еңбек және халықты әлеуметтік қорғау министрлігіне сілтеме жасап.
Биыл еліміздің солтүстік және шығыс өңірлеріне барлығы 5 мыңнан астам адам қоныс аударды. Оның ішінде Павлодар облысына – 1 886, Солтүстік Қазақстан облысына – 1 516, Қостанай облысына – 575, Шығыс Қазақстан облысына – 490, Абай облысына – 305, Ақмола облысына – 257, Атырау облысына – 103, Ұлытау облысына – 43 және Қарағанды облысына – 38 адам көшіп барды.
Қоныс аударушылардың көбі қандастарымыз. Олар негізінен Өзбекстаннан – 612 адам, Қытайдан – 563, Моңғолиядан – 377, Ресейден – 84, Түрікменстаннан – 49 және өзге елдерден – 49 адамнан тұрады.
Келгендердің ішінде еңбекке қабілетті 2 307 адам бар. Оның 1 041-і тұрақты жұмысқа орналасты, 38-і жеке кәсібін ашып, кәсіпкерлікпен айналысуда. Қоныстанушылардың басым бөлігі денсаулық сақтау, ауыл шаруашылығы, білім беру және өнеркәсіп салаларында еңбек етуде.
Мемлекеттік қолдаудың тиімділігін көрсететін мысалдың бірі – Құрмешовтар отбасы. Олар Маңғыстау облысынан Қостанай қаласына қоныс аударған.
Қанат Құрмешовтың «Ақпараттық жүйелер» және «Дене шынықтыру және спорт» мамандықтары бойынша жоғары білімі бар. Қазір ол Олимпиадалық резервтің балалар мен жасөспірімдер спорт мектебінде WKF каратэ жаттықтырушысы болып еңбек етеді.
Ал жұбайы Ләззат Оразмағанбет «Бастау бизнес» жобасы арқылы грант ұтып алып, фитнес-клуб ашқан. Биыл Қанат Құрмешов те 1,5 миллион теңгеден астам грант иеленіп, кондитерлік цех ашуға мүмкіндік алған.
«Мемлекет қолдауының арқасында жаңа ортаға тез бейімделіп, өз кәсібімізді дамыта бастадық. Бізге қолдау көрсеткен барша жандарға ризашылығымызды білдіреміз», – деді Құрмешов.
Айта кетсек, ерікті қоныс аудару бағдарламасы аясында мемлекет тарапынан келесі қолдау шаралары ұсынылады:
отбасы басшысына және әр мүшесіне 70 АЕК көлемінде көшуге арналған біржолғы төлем;
тұрғын үй жалдау мен коммуналдық қызметтерге 12 ай бойы 15–30 АЕК аралығында ай сайынғы субсидия;
қысқа мерзімді кәсіптік оқыту мүмкіндігі;
жұмысқа орналасуға немесе жеке кәсіп ашуға көмек;
экономикалық ұтқырлық сертификаттарын беру.
Сондай-ақ жұмыс берушілерге қоныс аударушыларды тұрғын үймен қамтамасыз етіп, кемінде екі жыл тұрақты жұмысқа қабылдаған жағдайда, әр қызметкер үшін 400 АЕК мөлшерінде біржолғы субсидия беріледі.