Таиланд астанасы Бангкокта 20 тамыз бен 1 қыркүйек аралығында зияткерлік даму ерекшеліктері бар спортшылар арасында жүзуден әлем чемпионаты өтті. Беделді бәсекеге 31 елден 300-ге жуық спортшы қатысты, деп хабарлайды kazlenta.kz тілшісі Астана қаласы әкімдігінің ресми сайтына сілтеме жасап.
Қазақстан намысын астаналық спортшылар Санжар Асқар, Әмір Алпамыс пен Валерий Югай қорғады.Жасөспірімдер санатында Санжар Асқар 100 метр баттерфляйда күміс медаль жеңіп алып, 200 және 400 метр қашықтыққа еркін стильде жүзуде екі мәрте қола жүлдегер атанды. Ал Валерий Югай 200 метрге кешенді жүзуде қола медаль иеленді.Ұлттық құрама жаттықтырушысы Ернұр Сайлаубектің айтуынша, бұл чемпионат Қазақстан үшін зияткерлік даму ерекшелігі бар спортшылар арасындағы алғашқы әлемдік дода болды.
«Интеллектуалдық даму ерекшеліктері бар тұлғалар спорты федерациясының» президенті Дина Темірғалиева да бұл жетістіктің тарихи маңыздылығын атап өтті:«Virtus әлем чемпионаты өте жоғары деңгейде өтті. Париждегі Паралимпиада чемпиондары да қатысты, бәсекелестік өте мықты болды. Қазақстан үшін бұл – Даун синдромы бар спортшылардың санатындағы алғашқы дебют және алғашқы тарихи медаль. Бұл нәтиже дұрыс бағытта келе жатқанымызды көрсетеді. Ендігі мақсатымыз – халықаралық ынтымақтастықты нығайтып, жаңа спортшыларды тәрбиелеу. Алдағы желтоқсанда Дубайда өтетін жасөспірімдер Параазия ойындарына дайындықты бастап кеттік», – деді ол.