Қарағандылық зейнеткерлерді 11,8 млн теңгеге алдаған күдікті ұсталды, - деп хабарлайды kazlenta.kz тілшісі Polisia.kz сайтына сілтеме жасап.
Қарағанды қаласының орталық полиция бөліміне үш күн ішінде егде жастағы әйелдерден алаяқтардың құрбаны болғаны жөнінде үш арыз түсті. Қылмыскерлер телефон қоңыраулары мен психологиялық қысымды шебер пайдаланып, сенгіш зейнеткерлерден ірі көлемдегі ақшаны иемденген. Алаяқтық сызбасы мұқият ойластырылған еді. Жәбірленушілердің стационарлық телефондарына белгісіз біреу қоңырау шалып, асығыс әрі абыржыған дауыспен олардың қызы немесе немересі жол-көлік оқиғасына себепкер болды деп хабарлаған. Фондағы бұрмаланған дыбыстар мен жақындарының дауысын шебер салған қылмыскерлер қарт кісілерді есеңгіретіп, тез шешім қабылдауға мәжбүр еткен. "Мәселені дереу шешу керек" деген сылтаумен олар курьер жіберіп, ақшаны бірнеше минут ішінде жеткізуді талап еткен. Жақындарының амандығына алаңдаған зейнеткерлер қолдарындағы бар қаражатын беріп жіберген. Үш оқиғадағы залалдың жалпы сомасы — 11,8 миллион теңге. Тергеу-жедел тобы барлық жағдайда ақшаны алып кеткен курьердің сипаттамалары ұқсас екенін анықтады.
Жедел іздестіру нәтижесінде полицейлер Қарағанды қаласының 23 жастағы тұрғынын ұстады. Жәбірленушілер оны еш қателеспей танып, курьер екенін растады. Тергеу барысында күдікті жасаған ісін мойындап, қарт кісілерге өзі қоңырау шалғанын және ақшаны тікелей өзі алғанын айтты. Қазіргі уақытта сотқа дейінгі тергеу амалдары жүргізілуде. Полицейлер оның бұрын жасалған ұқсас қылмыстарға қатыстылығын тексеруде.