Теміртауда банк қызметкерлерінің қырағылығы қала тұрғынын алаяқтардан құтқарды, — деп хабарлайды kazlenta.kz тілшісі Polisia.kz сайтына сілтеме жасап.
Бұған дейін Теміртау қаласының полиция қызметкерлері банк қызметкерлерімен ауқымды профилактикалық жұмыс жүргізіп, алаяқтықтың кең таралған схемаларын егжей-тегжейлі түсіндіріп, қызметкерлерді зиянкестердің ықтимал құрбандарын тануға үйретті. 22 шілдеде банкі менеджерінің қырағылығы ірі алаяқтықтың алдын алуға мүмкіндік берді. Банк қызметкері “102” желісіне қоңырау шалып, кассадан 6 миллион теңге қолма-қол ақша алған күдікті ер адам туралы хабарлады. Клиенттің мұндай ірі соманы алу мақсаты туралы сұраққа берген жауабы – "жеке қажеттіліктер үшін" – менеджерге сенімсіз болып көрінді, ер адамның мінез-құлқы алаңдаушылық тудырды. Оқиға орнына Киберпол қызметкерлері мен Шығыс ПБ учаскелік инспекторы Асылбек Дельманов жедел жетті. Теміртаудың 50 жастағы тұрғынымен әңгімелесу барысында оған өзін ҰҚК қызметкерімін деп таныстырған белгісіз біреу қоңырау шалғаны анықталды. Жалған қызметкер алаяқтарды ұстау бойынша арнайы операция жүргізіліп жатқанын хабарлап, ер адамның жинақтары қауіпті екенін мәлімдеді. Әңгіме барысында ер адам өзінің есепшотында 6 миллион теңге бар екенін айтып қалды.
Қоңырау шалған "қызметкердің" нұсқауларын орындай отырып, ол ақшаны шешіп алып, "қауіпсіз" есепшотқа аудармақ болған. Полицияның үйлесімді әрекеті мен банк қызметкерлерінің қырағылығының арқасында алаяқтық әрекеттерінің алдын алу және салымшының жинақтарын сақтау мүмкін болды. Полиция ескертеді, құқық қорғау органдарының қызметкерлері қоңырау шалып, ақшаны қауіпсіз шотқа аударуды сұрамайды. Жеке деректерді, шот нөмірлерін және банктік карталардың кодтарын бермеңіздер.