Астанада жалған доллармен сауда жасаған күдікті ұсталды, – деп хабарлайды kazlenta.kz тілшісі Polisia.kz сайтына сілтеме жасап.
Елордада автодүкен иесі полицияға шағым түсірді. Күнделікті табысты санау барысында 100 АҚШ долларын құрайтын жалған банкнот табылған. Тергеу барысында белгілі болғандай, дүкенге келген сатып алушы автокөлік бөлшектерін сатып алмақ болған. Алайда ол шынайы купюраның орнына сувенирлік ақшаны берген. Сатушы бұл сәтте мән бермеген. Кешкісін табысты есептеу кезінде дүкен иесі жалған ақшаны байқап қалған. Жедел-іздестіру іс-шаралары барысында полицейлер 43 жастағы күдіктіні анықтады. Ол өз кінәсін мойындады. Оның айтуынша, жалған купюраларды интернеттен сатып алған. Аталған факті бойынша қылмыстық іс тіркелді.
Белгілі болғандай, күдікті бұған дейін де дәл осындай қылмыс жасағаны үшін жауапқа тартылған. Полиция елорда тұрғындары мен қонақтарын алаяқтардың арбауына түспеуге шақырады. Егер сізге қатысты заңсыз әрекеттер жасалса, бірден "102" нөміріне хабарласыңыз.