Астанада «Жұмысшы мамандықтардың болашағы: бизнес пен білім серіктестігі» атты республикалық форум өтті. Іс-шараға 300-ден астам адам – Оқу-ағарту министрлігінің, Еңбек және әлеуметтік қорғау министрлігінің, «Атамекен» ҰКП, «Талап» КЕАҚ, жұмыспен қамту орталықтарының, колледждер мен бизнестің өкілдері қатысты, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Форумның басты тақырыбы техникалық және кәсіптік білім беру ұйымдары (ТжКБ) мен жұмыс берушілер арасындағы ынтымақтастықты нығайту болды. Мақсат – жұмысшы мамандықтардың беделін арттыру және жас мамандарға еңбек нарығының талаптарына бейімделуге көмектесу.
Іс-шараның ұраны – «Әлем өзгеруде – біз өзгереміз!».«Бизнес және білім» секциясы аясында дуальді оқытуды дамыту және жұмыс берушілердің заманауи сұраныстары талқыланды. Сондай-ақ, колледждер мен бизнес-серіктестер арасында меморандумдарға қол қойылды.Форумның маңызды сәттерінің бірі TEDx форматындағы студенттік стартаптардың тұсаукесері болды. Astana IT University студенттері – Даяна Арапбекова, Ақмарал Арынай және Әділ Біржанова колледждердегі қатысуды бақылау үшін мобильді қосымша ұсынды. Ол қазірдің өзінде өздері оқитын оқу орнына енгізілген және оқытушыларға студенттердің нақты уақыт режимінде болуын бақылауға мүмкіндік береді.
SID дизайн студиясының жетекшісі, «Тұран» колледжінің әлеуметтік серіктесі Семен Шейкин де өз пікірімен бөлісті:«Форум мен үшін тың жаңалықтарға толы болды. Жұмыс берушілер мен педагогтар проблемалардың бар екенін айтып, бірлескен шешім іздейді. Бұл – мықты кәсіби қоғамдастық құрудың маңызды қадамы».
Студенттер үшін тәжірибенің жетіспеушілігі мәселесі «Кәсіптік білім берудегі инновациялар» секциясының негізгі тақырыптарының біріне айналды. Бизнес және колледж өкілдері заманауи әдістемелер мен тәжірибеге бағдарланған тәсілді енгізуді талқылады.«Көптеген студент жеткілікті тәжірибе ала алмайды. Бизнес кадрларды даярлау процесіне енгізілуі тиіс. Тек осылай ғана нақты жұмысқа дайын мамандарды дайындауға болады», - деп атап өтті құрылыс компаниясының директоры Сағат Жұмабаев.Форум қорытындысы бойынша қатысушылар бизнес пен білім беру ынтымақтастығын күшейту бойынша ұсыныстар әзірледі. Қол қойылған меморандумдар ТжКБ түлектерінің тәжірибесі мен жұмысқа орналасуына жаңа мүмкіндіктер ашады.