Солтүстік Қазақстан облысының әкімі Ғауез Нұрмұхамбетов Петропавл іргесіндегі Заречный ауылын қайықпен аралады, елді мекенді биыл да су басты, - деп хабарлайды kazlenta.kz тілшісі Tengrinews.kz сайтына сілтеме жасап.
Бұл туралы ол әлеуметтік желіде жазды.
"Қайықпен Есіл өзені жайылмасында орналасқан және жыл сайын су тасқынына ұшырайтын Заречный кентіне бардым. Қазір жағдай тұрақты, су тұрғын үйлерге кірген жоқ", - деді ол.
Оқиға орнында қалалық әкімдік, құтқарушылар мен полиция қызмет атқарып жатыр, тәулік бойы кезекшілік бар, қорғаныс бөгеттері нығайтылған. Барлығы 200 адам жұмылдырылған.
"Тұрғындардың қауіпсіздігін қамтамасыз ету және қолдау көрсету бойынша барлық қажет шара қабылданып жатыр. Қызметкерлердің жанқиярлық еңбегі үшін алғысымды білдіремін", - деп жазды әкім.