Алматыда “Қауіпсіз жол” республикалық жедел алдын алу іс-шарасы аясында жергілікті полиция қызметінің қызметкерлері шетелде тіркелген, өтелмеген әкімшілік айыппұлдары бар көліктерді анықтау және ұстау бойынша күнделікті іс-шараларды жүргізіп жатыр, — деп хабарлайды kazlenta.kz тілшісі Polisia.kz сайтына сілтеме жасап.
Алматы қаласында жыл басынан бері әкімшілік айыппұлдары өтелмеген 150-ге жуық көлік анықталды. Олардың қатарында 4 миллион теңгеден астам айыппұлы төленбеген Mercedes, 2,8 миллион теңге берешегі бар Lada және 3,9 миллион теңге айыппұлы бар Toyota көлігі бар. Барлық аталған көлік арнайы айыппұл тұрағына жеткізілді.
Полиция өкілдері жазаның бұлтартпастығы қағидасын еске салып, жол қозғалысына қатысушыларды тәртіпке бағынуға, жол ережесін сақтауға және заңмен бекітілген міндеттемелерді дер кезінде орындауға шақырады.