Қазақстандықтар жеке куәліктің мерзімі аяқталған жағдайда оны онлайн режимде ауыстыру мүмкіндігіне ие болуы мүмкін. Жаңа жоба азаматтарға көрсетілетін қызмет сапасын жақсартуға және процесті оңтайландыруға бағытталған, деп хабарлайды kazlenta.kz тілшісі Polisia.kz сайтына сілтеме жасап.
ҚР Ішкі істер министрлігі мен Цифрлық даму, инновациялар және аэроғарыш өнеркәсібі министрлігі жеке куәліктің мерзімі аяқталған жағдайда оны онлайн форматта беру бойынша пилоттық жобаны іске қосуды жоспарлап отыр. Қызмет электрондық үкімет порталы (eGov) мен халықты құжаттандыруға арналған мобильді қосымшалар арқылы көрсетіледі.
Жоба "Мемлекеттік қызметтер туралы" заңды іске асыру аясында әзірленген. Оның мақсаты – мемлекеттік қызмет көрсету процесін жетілдіру, тиімділігін арттыру, сондай-ақ азаматтарға жеке куәлікті мерзімі аяқталуына байланысты ауыстыру кезінде қызмет көрсету сапасын жақсарту. "Қазақстан Республикасы азаматтарына төлқұжаттар мен жеке куәліктер беру" мемлекеттік қызметін онлайн форматқа көшіру жоспарлануда. Бұл өзгеріс тек жеке куәлікті оның мерзімі аяқталуына байланысты ауыстыруды қамтиды.
Айта кетейік, қызмет алушы электрондық үкімет порталы немесе мобильді қосымшалар арқылы жүгінген кезде, жеке куәлік тек оның қолданылу мерзімі аяқталуына байланысты рәсімделеді. Қызмет жеке куәліктің қолданылу мерзімі аяқталуына 30 немесе одан аз күн қалған жағдайда немесе оның мерзімі аяқталғаннан кейін 10 күннен аспайтын уақыт ішінде қолжетімді болады.