СҚО-да полицейлер такси жүргізушілерін тексерді, – деп хабарлайды kazlenta.kz тілшісі Polisia.kz сайтына сілтеме жасап.
Облыста қоғамдық тәртіпті сақтауға, азаматтардың қауіпсіздігін қамтамасыз етуге және шетелдіктердің көші-қон заңнамасын сақтауына бағытталған «Заңсыз келуші – таксист» жедел-профилактикалық іс-шарасы өтті.
Жолаушыларды тасымалдаушылар іс-шара кезінде полицияның назарында болды. Нәтижесінде 11 заңсыз тасымалдаушы анықталды, оның ішінде жақын шет елдердің бірінің 21 жастағы азаматы бар.
Бұдан бөлек, полицейлер жолаушыларды міндетті сақтандырусыз тасымалдаумен айналысқан 17 жүргізушіні анықтады. Тағы 24 адам техникалық тексеруден өтпеген көліктерімен жолаушылар тасымалдаған, ал 6 адамның көлік жүргізу құқығы болмаған.
Әрбір бұзушылық жолаушылардың қауіпсіздігіне қауіп төндіреді. Тәртіп сақшылары барлық тасымалдаушыларды заң талаптарын қатаң сақтауға шақырады.
Сондай-ақ іс-шара барысында көші-қон заңнамасының түрлі 92 бұзушылығы анықталды.