Қарағандыда заңсыз іс-әрекеттер ұйымдастырған сотталғанның жаза мерзіміне 6 жыл қосылды, – деп хабарлайды kazlenta.kz тілшісі Polisia.kz сайтына сілтеме жасап.
Қарағанды қаласындағы №61 мекемеде тонау және көлікті заңсыз иемдену қылмысы үшін жазасын өтеп жатқан сотталған адам басқа сотталғандармен сөз байласу арқылы қарсылық шарасын ұйымдастырған. Қамаудағылар бұл әрекеттердің барлығын колониядағы жағдайды тұрақсыздандыру мақсатында жасаған.
Бағынбау фактісі бойынша сотқа дейінгі тергеп-тексеру жүргізілді. Осы жылдың қараша айында сот процесі өткізіліп, нәтижесінде сотталған тағы 6 жыл 2 айға бас бостандығынан айырылды. Үкім заңды күшіне енген жоқ.
– Қаңтар айында бірнеше рет сотталған адам жағдайды тұрақсыздандыру мақсатында бас бостандығынан айыру орындарында болып, басқа сотталғандармен сөз байласып, қарсылық шарасын ұйымдастырған. Аталған фактілер жаппай бейнебақылау жүйесімен тіркеліп, сот процесінің қорытындысы бойынша сотталған адам кінәлі деп танылды. Ол жазасын қауіпсіздігі барынша жоғары ҚАЖ мекемесінде өтейді, – деді Қарағанды облысы және Ұлытау облысы бойынша ҚАЖД-ға қарасты №61 мекемесі бастығының орынбасары Есімжан Байтасов.
Пенитенциарлық мекемелерде тәртіпті сақтау – қылмыстық-атқару жүйесінің негізгі міндеттерінің бірі. Арнайы контингент тарапынан заңсыз әрекеттердің барлық дерегі жаппай бейнебақылау камераларына жазылады.