Қорғаныс министрлігі Ақтау гарнизонындағы 25744 әскери бөлімінің мерзімді қызметтегі әскери қызметшісінің қазасына қатысты түсінік берді, деп хабарлайды kazlenta.kz тілшісі Zakon.kz сайтына сілтеме жасап.
Ведомствоның мәліметінше, іс Қорғаныс министрінің ерекше бақылауына алынды.
"Оның тапсырмасы бойынша Қорғаныс министрінің орынбасары генерал-майор Жазықбаевтың басшылығымен арнайы комиссия құрылды. Қайғылы жағдайдың мән-жайы жан-жақты тексеріліп, тергеу органдарына объектив тергеу жүргізу үшін толық көмек көрсетілу үстінде. Кінәлі тұлғалар ҚР Қылмыстық кодексіне сәйкес қатаң жауапкершілікке тартылады", - делінген ресми мәлімдемеде.
ҚР Қорғаныс министрлігінің басшылығы қаза тапқан әскери қызметшінің отбасы мен туыстарына көңіл айтты. Сондай-ақ сарбаздың туыстары мен жақындарына жан-жақты көмек көрсетілетінін хабарлады.
Маңғыстау облысындағы полигонда қаза тапқан сарбаздың әкесі Қорғаныс министрлігі басшысына видеоүндеу жасады.
Ол оқиғаның жан-жақты тергелуін талап етіп отыр және мұның оқыс жайт екеніне сенбейді.