Су ресурстары және ирригация министрі Нұржан Нұржігітов суды пайдаланудың жаңа тарифіне қатысты пікір білдірді, деп хабарлайды kazlenta.kz тілшісі Қазақпаратқа сілтеме жасап.
«Тариф саясатын Ұлттық экономика министрлігі айқындайды. Ал ұсыныстар жергілікті атқарушы органдардан келіп түседі. Тарифтік саясат 4 позицияға бөлінді, яғни егер адам суды нормадан көп тұтынса, бекітілген тарифке сәйкес көбірек төлейді. Бұл қалыпты тәжірибе, біз суды үнемдеп қолдануды үйренуіміз керек», - деді Нұржан Нұржігітов Мәжілісте өтіп жатқан «Республикадағы сарқынды суларды қайта пайдаланудың проблемалары мен перспективалары» атты дөңгелек үстелден кейін БАҚ өкілдерінің сауалына жауап бере тұрып.
Сондай-ақ, журналистер министрден «Тарифтің өсуі тауарлар мен қызметтердің бағасына кері әсер етпей ме?» деп сұрады.
«Тарифті белгілеген кезде жан-жақты қаралатын шығар. Шынымды айтсам, біздің министрлік тариф бағасын қоюмен айналыспайды. Бұл Ұлттық экономика министрлігіне қарайтын сұрақ», - деп жауап берді ведомство басшысы.
Бұған дейін елімізде суды үнемдеп тұтынудың жаңа тарифі енгізілгені туралы хабарлаған едік.
Министрдің айтуынша, аталған бұйрық 11 ақпанда күшіне енді. Бекітілген бұйрықта суды тұтыну лимитін 4 деңгейлі тарифпен белгілеу көзделген.