Шымкентте «Жұлдыз» индустриалды аймағында инфрақұрылым жүйелерінің құрылысы жүргізіліп жатыр. Қала әкімі Ғабит Сыздықбеков құрылыс барысындағы өзекті мәселелерді талқылау мақсатында аймаққа арнайы барып, жауаптылардың қатысуымен көшпелі жиын өткізді. Индустриалды аймақта салынып жатқан бірқатар кәсіпорынның құрылысымен танысты.
Осыған дейін аталған аймаққа жобада қаралған 12,5 шақырым ауыз су құбырының 90%-ы, табиғи газ құбырларының бүгінге дейін 7,5 шақырымы тартылған. Сондай-ақ 10 шақырым кәріз жүйесі жүргізіліп, электр қуаты желісінің құрылысы 80%-ға аяқталған. Жол құрылысы да жобаға сәйкес атқарылуда. Қазіргі таңда жалпы ұзындығы 13,8 шақырым автомобиль жолының 2,1 шақырымы, ішкі орам жолдардың 10,2 шақырымы жүргізілген.
Мемлекет басшысы отандық тауарөндірушілерді қолдау арқылы импортқа тәуелділікті азайту мақсатында өңір басшыларына бірқатар тапсырма жүктеген болатын. Президент тапсырмасы аясында бүгінде мегаполисте индустриалды аймақ қатары артып келеді. Аталған аймақтағы инженерлік инфрақұрылым және автомобиль жолдарының құрылысы 2024 жылдың желтоқсан айында аяқталады. 306 гектарды алып жатқан алаңда 30-ға жуық инвестициялық жобаны жүзеге асыру жоспарланып отыр. Қала әкімі жауаптыларға құрылыс сапасын назарға алып, кәсіпкерлерге қолайлы жағдай жасауды тапсырды.
Индустриалды аймақта салынып жатқан ірі кәсіпорынның бірі - «Ferrum Constraction & Chemical» ЖШС-і. Толық іске қосылғанда жылына 60 мың текше метр темір-бетон бұйымдарын шығарады. Қазір құрылыс-монтаж жұмыстары 90 пайыз аяқталған. Кәсіпорынды биыл іске қосу көзделуде. Қала басшысы жауаптылармен бірге керамогранит өндіретін «Wan Sheng Ceramic» ЖШС-нің құрылысын да аралап көрді. Зауыттың бірінші кезеңін келесі жылы, екінші кезеңін 2025 жылы іске қосу жоспарланып отыр.
Ал "Оңтүстік Plastic KZ" кәсіпорны үйлерге арналған жаңбыр суағарлары мен кәріз құбырларын өндіреді. Зауыттың өндірістік қуаты айына 600 тоннаны құрайды. Қала басшысы аталған кәсіпорынның құрылыс-монтаж жұмыстарын да қадағалады. Жоба биыл жүзеге асырылады. Кәсіпкерлер жер телімдерін қайтару, инфрақұрылыммен қамту бойынша бірқатар өзекті мәселені жеткізді. Қала әкімі жауаптыларға құрылыс барысындағы кедергілерді тез арада жойып, мемлекеттік қолдау шаралары аясында жан-жақты қолдау көрсетілетінін жеткізді.