Сотқа барлығы 11 адам тартылды, олардың біреуі қамауда, қалған 10 айыпталушы үйқамақта отыр.
Бүгін прокурор Ахат Естібек айыптау актісін оқыды. Барлық 11 сотталушыға екі бап бойынша айып тағылды: Қазақстан Республикасы Қылмыстық кодексінің 272-бабының 2-бөлігі "Жаппай тәртіпсіздік" және ҚР ҚК 269-бабының 3-бөлігі "Ғимараттарға, құрылыстарға, қатынас және байланыс құралдарына шабуыл жасау немесе оларды басып алу".
Прокурор айыптау актісін оқып болған соң, судья сотталушыларға сөз берді. Олардың жетеуі тағылған айыппен ішінара келіссе, төртеуі келіспейтінін айтты.
Келесі отырыс 10 қазанға жоспарланған.
2022 жылғы қаңтар айының басында Қазақстанда сұйытылған газ бағасының екі есе өсуіне қарсы жаппай наразылық болды. 2 қаңтарда Жаңаөзенде митингілер өтіп, кейін Ақтау, Атырау және еліміздің басқа да қалаларында оларға қолдау көрсетілді. Алайда кейін бейбіт шеру жаппай тәртіпсіздікке ұласты. Әсіресе Алматы зардап шекті. 5 қаңтарда қаруланған топ қала орталығын қиратып, әкімдік ғимараты мен жанындағы президент резиденциясын өртеп жіберді. Полиция ғимараттарына, Ұлттық қауіпсіздік комитетіне және басқа да әскери нысандарға шабуыл жасалды.