Әкімдіктің хабарлауынша, қазір тұрғындардан келіп түскен өтініштер бойынша тексеру жұмыстары жүргізілуде. "Тараз қаласының аумағында 2022 жылғы 14-15 қарашасында жылдамдығы 15-20 м/с кейде 23-28 м/с болатын желді дауыл тіркелді. Қазіргі уақытта қала әкімдігінің тұрғын үй қатынастары бөлімінің қызметкерлері қала аумағында орын алған фактілер бойынша тексеру жүргізуде. Білім беру және денсаулық сақтау нысандарында шатырдың зақымдануы тіркелген жоқ.
"Шаңырақ" ауданындағы тарату пунктінен трансформаторлық торапқа өтетін электр желісі желдің салдарынан істен шығып, 28 үйде электр қуаты апатты түрде ажыратылды. Сондай-ақ 4 көпқабатты үйдің электр қуаты апатты түрде сөндірілді. Мердігерлік мекеме үйлерді уақытша электр желісімен қамтамасыз етті. Жеке үйлердің тұрғындарынан электр қуатын өшіру туралы 16 өтініш түсті. Бағдаршамдардың үздіксіз жұмысын қамтамасыз ету үшін қала бойынша 3 бригада жұмыс істейді. Қазіргі уақытта бірнеге көше қиылысында бағдаршамдардың жұмысы қалпына келтірілді", - деді Тараз әкімдігі.
Тараз әкімдігінің мәліметінше, дауыл салдарынан тұңғыш президент саябағындағы мемлекеттік ту жыртылған. "Сонымен қатар 25 билборд (28 баннер), 3 пилон, 1 қоршау, тұңғыш президент саябағында 6х12 өлшемді мемлекеттік ту жыртылды. Көше қиылысында желдің салдарынан ағаштардың құлауы туралы өтініштер келіп түсті", - деді Тараз әкімдігі. Естеріңізге сала кетейік, осыған дейін Таразда ауа райына байланысты балабақша жұмысы мен 1, 2-ауысым үшін сабақ тоқтатылғанын айтқан болатынбыз.