Игорь Дужнов жауап алу кезінде 2021 жылғы 20 қыркүйектегі оқиғаның мән-жайын айтты. Айыпталушының айтуынша, сот орындаушы оларды заңсыз көшірмек болған.
Отбасымды көшеге қаңғыртып жіберетінін түсіндім. Заңсыз көшіруді тоқтатудың бірден-бір жолы үйімнің аумағына басып кірген қарсыласты талқандауға бағытталған белсенді қарсылықты қолдану болды. Гаражда қаруым болатын. Мен гаражға кіріп, үлкен оқжатарға он оқ салып, ыңғайлы жерге бардым да, басқыншыларға: «Қабырғаға!» деп бұйрық бердім. Қатысы жоқ адамдарға шетке кетіп қалуға мүмкіндік бердім, - деді Игорь Дужнов.
Сотталушы өзін кінәлі деп санамайды, өйткені ол отбасын заңсыз көшіруге жол бермеуде басқа амал болмады деп отыр.
Еске салсақ, 2021 жылғы 20 қыркүйекте Алматының Алатау ауданындағы Ақбұлақ шағын ауданында 54 жастағы Игорь Дужнов үйіне барған сот орындаушы мен бірнеше адамға оқ жаудырды. Бес адам қайтыс болды. Олардың арасында сот орындаушысы, екі полицей және екі бейбіт тұрғын бар. Кейін бейбіт тұрғындардың бірі үйдің жаңа қожайыны, ал екіншісі оның танысы болғаны анықталды.
«Кісі өлтіру» және «Билік өкіліне шабуыл» бабы бойынша тергеу басталды.
Ол 20 жылға дейін немесе өмір бойына бас бостандығынан айырылуы мүмкін.